تعلم الرسم الآن!

السلام عليكم ورحمة الله وبركاته

في البداية حابب اوريكم رسمتين قبل وبعد لي شخصيا في رحلة تعلم الرسم عشان أدخل في الموضوع بقلب جامد زي مايقولوا 

الي قدامكم رسمتين لي ترى! طيب كيف انتقلت هذه النقلة ماشاء الله تبارك الله ؟؟ تعالوا خلوني اشرح لكم شوية مفاهيم مهمة 

أكذوبة الموهبة:

أول شيء لازم نفهم أن الرسم عملية ذهنية بشكل بحت مثل الرياضيات! مخك يعمل على تحليل المشهد ويدك تحاول تقييد ملاحظات المخ، هذا كل مافي الرسم كعملية وهي مايهمنا جميعا!

الموضوع لا علاقة له ابدا بالموهبة المزعومة! الرسم مثله مثل أي علم عقلي يحتاج إلى ممارسة المشكلة هنا أنك تمرن عضوين في جسمك تمرن مخك على الملاحظة والتدقيق وتمرن يدك على التقييد بشكل دقيق

يعني مثلا هذه رسمتين لصورة واحدة لتوم كروز

شايفين الفرق الكبير ؟ ايش الفرق الفعلي ؟ العقل ببساطة صار أقوى و أكثر دقة في رصد التفاصيل!

أرجعوا للرسمة الأولى فوق عارفين كم رسمة بين الرسمتين ؟ أكثر من 50 رسمة ^^ ماشاء الله ومع كل رسمة يتطور العقل في رصد الملاحظات وتتحسن اليد في تقييدها وعندكم دا مثال بسيط على الرغم انو حتى النتيجة الي في اليمين الي هي الأخيرة لكن ماهي نفس الصورة الأصلية لأنو دي الرسمة وانا لسى في بداياتي

بيان الحق وإزهاق الباطل:

إذا الهدف هنا أني أفركش هرجة الموهبة الي ازعجتوا أهلنا فيها .. الموهبة مو في الرسم كعملية، الموهبة مرتبطة بالروح بالفن الناتج، بالأسلوب، بالإحساس الي ترسله. في رسامين كثر كانوا وبال على الرسم كعملية لكن احساسهم عالي على الرغم من ان رسمهم سيء! ولو اني أكره كلمة موهبة على كل حال لأني أظن اننا ابتكرناها حتى نجد عذر مثالي لليأس وصرف النظر عن أي هواية كلمة موهبة جديرة بتحطيم كل الآمال.

لا يوجد شيء اسمه موهبة يوجد فقط العمل الجاد!

مع ذلك كله نحن هنا نتحدث عن عملية ذهنية لا زال هناك تفاوت بسيط بين البشر ولا علاقة له بالموهبة أكثر من طريقة التمرين المناسبة يعني شرح الرياضيات يختلف من مدرس لآخر مدرس تشعر معاه بالملل وماتفهم ولا نص كلمة ومدرس تاني تخرج فاهم الدرس ومنتا داري كيف فهمت اللهم انك فهمت .. ببساطة يعتمد على طريقة التمرين ومدى تقبل عقلك لها!

لي صديق في الكلاس والله أول مرة أشوف رسمة له انفجعت قسم بالله ماعرفت هو راسم ايش بالزبط المفروض انه وجه لكن ما اشوف اي ملامح ابدا ولا حتى عين كدا لوحدها اقدر اميزها والوجه مو مستقيم لا كذا حوالين الورقة كلها كنت اشفق عليه جدا جدا المدرسين كانوا يقعدوا معاه كل كلاس يعيدوا عليه نفس الكلام – وهذا الغباء بعين امه – المهم أنه الآن يرسم تمام ما اقول ممتاز لكن تقدر تميز ملامح الي يرسمه يعني لو رسم صورة توم كروز تقدر تعرف انه راسم توم كروز وهذا تحسن فضيع جدا جدا جدا بالنسبة له وبالمناسبة هو حالة شاذة حتى الآن يعني من بين كل الفصل الكل تحسن بشكل كبير جدا حتى الآن أنا لما ارسم بدون مراجع او صور خصوصا صور جانبية الرسم ممتاز جدا بعكس السابق كأني راسم غول 

وبالمناسبة الرسمتين كلهم في نفس اليوم عشان بس تعرف قوة العقل وتبطل تفكير بالموهبة دي .. حتى لو جينا نفكر الموهبة دي هي عبارة عن تطور مستمر الواحد ما يخرج من بطن امه ماسك في يده مرسام! حبة حبة يبدأ يرسم دائرة بكرة يزود دائرة تانية بعدو تانية وهكذا و فقط جرب اترك الرسم لمدة سنة أو اثنين وبعدين ارجع ارسم و وريني الموهبة حقك هههههه

عزيمة و إصرار:

طيب دحين إذا انت فعلا جاد تتعلم الرسم في هذه التدوينة جمعت لك دروس لؤطة ومجموعة كتب قيمة جدا وهي الي أنا بنفسي تعلمت عن طريقها مو مهم تفهم انجليزي بقدر انك تشوف الصور وتحاول تفهم و إذا مرة ماعرفت جرب ترجمها مرة مازبطت تعال عند المحروس سي سيد عبدالله ولد سعيد حيكون سعيد جدا بخدمتك كيف الروقان بس هههههه

لا من جد أي شخص يحب اساعده في تعلم الرسم بعد مايجرب بنفسه حكون سعيد بخدمته ولا تتوقع انو في خطوات سحرية الموضوع كله ممارسة ودقة ملاحظة وممكن انبهك على نقاط او أعلمك تقنيات حسب تطورك ومستواك. ^_^

المفتاح الحقيقي لتعلم الرسم هو في فهم تشريح الوجه، مناطق العظام و العضلات وغيرها أغلب دروس الرسم تعطيك في البداية نسب وقياسات تمشي عليها حاول تفهمها لكن لا تتقيد بها كليا لأنها راح تتغير تماما بمجرد تغيير زاوية الوجه!

YOUTUBE

موقع اليوتيوب جامعة لكل العلوم والفنون جرب أبحر فيه واستخدم مفاتيح بحث زي

anatomy, figure, drawing, head, face

ودي مجموعة دروس فيديو جمعتها عالسريع لكم وابحثوا عن غيرها

وهذه سلسلة كاملة لا بأس بها

وهذه قناة ممتازة كمان  Glenn Vilppu

والآن جينا للهدية الخاصة مجموعة كتب متميزة جدا جدا جدا للمبدع Andrew Loomis

تصفحوا الكتب تتكلم عن رسم الجسم من إلى وزي ماقلت لكم أنا تعلمت عن طريقها بالإضافة إلى توجيهات المدرسين ونقدهم كنت كل اسبوع اسوي لهم قلق اوريهم رسمة الواجب واقول لهم انقدوني حتى انتبه في الواجب الجاي وهكذا فا اتمنى احد يرسم رسمة كاملة من قلب ويجي يطفشني 

مجموعة كتب تعلم الرسم لـ Andrew Loomis

* بطبيعة حال كتب الرسم الأجنبية غض البصر انت وياه

حتى الآن هذا ماعندي فيما يخص هذا الموضوع والي يحب يشوف بعض أعمالي يزور المعرض من هنا أو على فلكر

ملحوظة: تشديدي على فكرة الموهبة في الرسم لا يعني أني أحقر من يرى أنها حقيقة أنا فقط اود أن يتعلم الجميع كما تعلمت بدون قيود .. من الصفر! و أعتذر على فظاظتي.

عبدالله سعيد